Rossiya harbiy xarajatlarni oshirdi, G‘arbda o‘q-dorilar tugamoqda, Prigojin samolyotini hech kim urib tushirmadi — Putin
07.10.2023 126 views
Vladimir Putin «Valday» xalqaro munozara klubida qariyb 4 soat gapirdi. U dunyo qanday tuzilishi kerakligi, G‘arb va Ukrainadagi urush sabablari, Prigojinning halokati haqidagi ko‘plab savollarga javob qaytardi.
Rossiya prezidenti Vladimir Putin «Valday» xalqaro munozara klubining 20-yig‘ilishi yalpi majlisida ishtirok etdi. Putin nutq so‘zlab, G‘arbni va uning «dunyodagi ta’sirini» tanqid qildi, shuningdek, dunyo qanday tuzilishi kerakligi haqidagi qarashlarini bayon etdi. Keyin boshqa ishtirokchilar bilan «munozara» davomida savollarga javob berdi. Rossiya prezidentining to‘liq nutqi Kreml saytida e’lon qilindi. Meduza uning nutqidan asosiy iqtiboslarni keltirdi.
Putinning nutqi mazmuni (qisqacha)
Qariyb 20 yil avval klub yig‘ilishida ilk bor uchrashganimizda mamlakatimiz o‘z taraqqiyotining yangi bosqichiga qadam qo‘ygan edi. Biz bor kuch-g‘ayratimiz va ezgu niyatimiz bilan yangi, bizga adolatli ko‘ringan dunyoni qurish jarayonlariga qo‘shildik. Ba’zilar bizning konstruktiv hamkorlikka tayyorligimizni noto‘g‘ri tushunishdi — ular buni Rossiya boshqa birovning yo‘l-yo‘rig‘iga ergashishga, kimningdir manfaatlaridan kelib chiqishga tayyorligini tan olishi deb tushunishdi. Shuncha yillar davomida biz bir necha bor ogohlantirganmiz: bunday yondashuv harbiy to‘qnashuv xavfi ortishiga olib keladi. Lekin hech kim bizni tinglashni xohlamadi.
G‘arbdagi «hamkorlarimiz» takabburligi quyushqondan chiqdi. AQSh va uning sheriklari harbiy, siyosiy, iqtisodiy, madaniy, ma’naviy va qadriyatlar gegemonligi sari qat’iy yo‘l tutdilar. G‘arb asrlar davomida koloniyalarni talon-taroj qilish orqali, butun sayyorani talon-taroj qilish orqali gullab yashnadi. G‘arb tarixi mohiyatan cheksiz ekspansiya solnomasidir.
Biz muttasil oshib borayotgan harbiy-siyosiy bosimga javob berishimiz kerak. Men «Ukrainadagi urush»ni boshlamaganimizni bir necha bor aytganman. Biz uni tugatishga harakat qilyapmiz. G‘arbning bevosita ko‘magida Kiyev rejimi boshlagan urushga bugun o‘n yil bo‘ldi va uni to‘xtatish uchun maxsus harbiy operatsiya o‘tkazilmoqda. Ukraina inqirozi hududiy mojaro emas. Savol ancha kengroq va muhimroq: biz yangi dunyo tartibi asoslanadigan tamoyillar haqida gapiryapmiz.
G‘arbga doimo dushman kerak. Rossiya — G‘arb siyosatchilarining sevimli mavzusi. G‘arb elitasi Xitoymi, Hindistonmi, arab davlatlari yoki musulmonmi, o‘zini mustaqil tutadigan har bir kishidan dushman yasashga harakat qilmoqda. Qo‘shma Shtatlar xavfsizlik va iqtisodiy sohadagi qarorlarni Yevropaga majburan singdirmoqda. G‘arblik «hamkasblar», ayniqsa Qo‘shma Shtatlardan, kim o‘zini qanday tutishi kerakligini ochiq-oydin surbetlarcha o‘rgatmoqda. Umuman olganda, kim bo‘libsiz o‘zi? Ko‘zingizni oching, mustamlakachilik davri allaqachon tugadi deb aytging keladi.
Putinning savollarga javoblari (yanada qisqacha)
Rossiya iqtisodiyotini harbiylashtirilishi to‘g‘risida
Mudofaa xarajatlarimiz oshdi, lekin nafaqat mudofaa, balki mudofaa va xavfsizlik xarajatlari. Ular taxminan ikki baravar ko‘paydi — bu taxminan uch foizni tashkil etardi, hozir esa oltiga yaqin. Biz «qurol-yarog‘ga ko‘p pul sarflayapmiz va nonni unutdik» deyish to‘g‘ri emas. Shuni alohida ta’kidlashni istardimki, avvaldan e’lon qilingan barcha rivojlanish rejalari, strategik maqsadlarga erishish va davlat tomonidan aholi oldidagi barcha ijtimoiy majburiyatlar to‘liq amalga oshirilmoqda.
G‘arbdan Ukrainaga harbiy yordam to‘g‘risida
Ukraina iqtisodiyoti tashqi yordamsiz mavjud bo‘lolmaydi. U yerda hamma narsa tashqaridan muvozanatlashtirilgan. Lekin nima hisobiga? Oylik ko‘p milliard dollarlik sarmoyalar tufayli. Agar buni to‘xtatsangiz, bir hafta ichida hamma narsa tugaydi. Xuddi shu narsa mudofaa tizimiga ham tegishli. Tasavvur qiling, ta’minot ertaga to‘xtaydi — o‘q-dorilar tugashi bilan bir hafta yashashingiz mumkin. Ha, ular G‘arbda ham tugayapti.
Yevropa kengashi rahbari Sharl Mishelning «Rossiya arman xalqiga xiyonat qilgani» haqidagi so‘zlari to‘g‘risida
Putin: Bilasizmi, xalqimizda maqol bor: kimning baytali ma’rasa ham, seniki jim tursin.
Boshlovchi: Sigir.
Putin: Sigirmi, baytalmi — bu muhim emas. Qisqasi, qandaydir hayvon.
Odessa haqida
Odessa, albatta, rus shahri, lekin u oz-moz yahudiy. Faqat oz-moz.
SS faxriysi taklif qilingan Kanada parlamentining yig‘ilishida ishtirok etgan Vladimir Zelenskiy haqida
Hamma bu natsistni, xususan Ukraina prezidenti, tomirida yahudiy qoni oqayotgan, millati yahudiy bo‘lgan odamning bu natsistni olqishlayotgani mutlaqo jirkanch ko‘rinadi. Bu nafaqat natsistlar izdoshi, balki yahudiylarni o‘z qo‘llari bilan yo‘q qilgan shaxs.
«Vagner» asoschisi Yevgeniy Prigojinning halokati haqida
Shubhasiz, [«Vagner»] rahbariyatiga nima bo‘lgani haqidagi savol havoda muallaq turibdi. Tergov qo‘mitasi rahbari kecha menga aviahalokatda qurbon bo‘lganlarning jasadida qo‘l granatasi bo‘laklari topilgani haqida xabar berdi. Samolyotga hech qanday tashqi ta’sir ko‘rsatilmagan. Bu allaqachon tasdiqlangan fakt — Rossiya Tergov qo‘mitasi tomonidan o‘tkazilgan ekspertiza natijalari.
Afsuski, qurbonlarning qonida alkogol yoki giyohvand moddalar borligi bo‘yicha hech qanday ekspertiza o‘tkazilmadi. Garchi biz bilamizki, Sankt-Peterburgdagi [«Vagner»] ofisida FXX nafaqt naqd 10 milliard rubl, balki 5 kilogramm kokainni ham topgan. Menimcha, bunday ekspertiza o‘tkazilishi kerak edi, lekin o‘tkazilmadi.
